សម្តីមួយឃ្លារបស់គ្រូពេទ្យទេវតា Richnner បញ្ជាក់ពីទំហំចិត្តស្រលាញ់កុមារកម្ពុជាជាងខ្លួនឯង

សម្តីមួយឃ្លារបស់គ្រូពេទ្យទេវតា Richnner បញ្ជាក់ពីទំហំចិត្តស្រលាញ់កុមារកម្ពុជាជាងខ្លួនឯង

Posted 11/9/2018

 

ភ្នំពេញ៖ នៅក្នុងលោកយើងនេះ ស្ទើរតែមិនមានមនុស្សណាហ៊ានលះបង់សុភម​ង្គលខ្លួនឯង សុខចិត្តមកលំបាកកាយ លំបាកចិត្ត ស៊ូវេទនាគ្រប់សព្វបែបយ៉ាង ដើម្បីប្រមូលថវិកាសម្រាប់ជួយផ្គត់ផ្គងអ្នកដទៃនោះទេ។ ជាពិសេស ការផ្គត់ផ្គងទៅលើជាតិសាសន៍ដទៃ ដែលសូម្បីតែខ្លួនឯងមិនបានកើតនៅទីនោះ។

តែរឿងដ៏អស្ចារ្យមួយនេះ វាបានកើតឡើងពិតៗមកលើប្រទេសកម្ពុជា តាមរយៈលោកវេជ្ជបណ្ឌិត Beat Richnner “Beatocello” ស្ថាបនិកមន្ទីរពេទ្យគន្ធបុប្ផា។​ លោក Beatocello សញ្ជាតិស្វីស បានកើតនៅថ្ងៃទី១៣ ខែ​មីនា ឆ្នាំ​១៩៤៧ និងបានទទួលមរណភាពនៅថ្ងៃទី០៩ ខែកញ្ញា ឆ្នាំ២០១៨។ ការទទួលមរណភាពរបស់បិតាសង្គ្រោះកុមារកម្ពុជានេះ បានធ្វើឲ្យប្រជាពលរដ្ឋខ្មែរ នឹកស្តាយស្រណោះអាឡោះអាល័យយ៉ាងខ្លាំងចំពោះរូបលោក។

លោក Beatocello បានចំណាយពេលរបស់លោកជាមួយកុមារកម្ពុជារហូតដល់ជីវិតក្រោយរបស់លោកក្នុងវ័យ ៧១ឆ្នាំ។ កាលគាត់នៅមានជីវិតគាត់ធ្លាប់មានប្រសាសន៍មួយឃ្លាថា “ ប្រសិនបើខ្ញុំយកប្រពន្ធកូន ខ្ញុំគ្មានពេលដើរកូតភ្លេង សុំលុយបរទេសជួយដល់កុមារកម្ពុជាឡើយ” ។ ពាក្យមួយឃ្លានេះ បានបញ្ជាក់ពីសន្តានចិត្តរបស់គាត់ដែលមានចំពោះប្រជាជនកម្ពុជា ជាពិសេសកុមារកម្ពុជាខ្លាំងជាងស្រលាញ់ខ្លួនឯងទៅទៀត។

គួរបញ្ជាក់ថា ដើម្បីជួយដល់កុមារកម្ពុជា តាមរយៈការព្យាបាលដោយមិនគិតថ្លៃ លោកវេជ្ជបណ្ឌិត Beatocello បានប្រឹងប្រែងកៀរគរថវិកាពីគ្រប់ទីកន្លែង ជាពិសេសពលរដ្ឋប្រទេសស្វីស តាមរយៈការលេងសេឡូរបស់លោក ដើម្បីមកទ្រទ្រង់ការចំណាយក្នុងមួយឆ្នាំប្រមាណ ២៣លានដុល្លារអាមេរិក ៕

អត្ថបទដោយ៖ ម៉េង សុងលី