សម្តេចហ៊ុន សែន៖ កម្ពុជាគ្រោងខ្ចីលុយពីចិន ដើម្បីសង់ផ្លូវតភ្ជាប់ពីកម្ពុជាទៅចិន និងអាស៊ានHun Sen: Cambodia plans to borrow money from China to build a connecting route from Cambodia to China and ASEAN

សម្តេចហ៊ុន សែន៖ កម្ពុជាគ្រោងខ្ចីលុយពីចិន ដើម្បីសង់ផ្លូវតភ្ជាប់ពីកម្ពុជាទៅចិន និងអាស៊ាន

Posted 13/9/2018

                   ប្រទេសកម្ពុជាគ្រោងស្នើដល់រដ្ឋាភិបាលចិន ដើម្បីផ្តល់កម្ចីសម្បទាន សម្រាប់កម្ពុជាក្នុងការសាងសង់ហេដ្ឋារចនាសម្ព័ន្ធរូបវ័ន្ត ដែលតភ្ជាប់ពីផ្ទៃក្នុងប្រទេសកម្ពុជាទៅបណ្តាប្រទេសតំបន់អាស៊ាន និងចិន តាមរយៈផ្លូវទឹក ផ្លូវគោក និងផ្លូអាកាស តែមិនទាន់បានបញ្ជាក់ទំហំទឹកប្រាក់ចំនួនប៉ុន្មាននោះទេ។ ក៏ប៉ុន្តែគម្រោងកម្ចីនេះ អាចមានទំហំទឹកប្រាក់រាប់ពាន់លានដុល្លារ បើតាមទំហំនៃគម្រោង។

ក្នុងជំនួបជាមួយក្រុមហ៊ុនទាំង៦របស់ចិនថ្មីៗនេះ សម្តេចហ៊ុន សែន នាយករដ្ឋមន្រ្តី បានគូសបញ្ជាក់ដល់អ្នកវិនិយោគទុនចិន ពី​គម្រោងដែលរាជរដ្ឋាភិបាលកម្ពុជា គ្រោងស្នើដល់រដ្ឋាភិបាលចិន ក្នុងការផ្តល់កម្ចីសម្បទានដល់ ការសាងសង់ហេដ្ឋារចនាសម្ព័ន្ធរូបវ័ន្ត ក្នុងប្រទេសកម្ពុជា ដែលក្នុងនោះមានការតភ្ជាប់ផ្ទៃក្នុងប្រទេស និងការតភ្ជាប់ជាមួយនឹងបណ្តាប្រទេសក្នុងតំបន់អាស៊ាន ក៏ដូចជាការតភ្ជាប់ទៅកាន់ប្រទេស ចិន តាមរយៈផ្លូវទឹក ផ្លូវគោក និងផ្លូវអាកាស។

វាជាសញ្ញាណល្អ សម្រាប់ការអភិវឌ្ឍន៍នៅកម្ពុជា នៅពេលដែលមានការអភិវឌ្ឍន៍ហេដ្ឋារចនាសម្ព័ន្ធរូបវ័ន្តល្អប្រសើរ ព្រោះបានចូលរួមអភិវឌ្ឍន៍សេដ្ឋកិច្ច តាមរយៈការទាក់ទាញវិនិយោគិនបរទេស កាត់បន្ថយការចំណាយ ងាយស្រួលអភិវឌ្ឍន៍វិស័យផ្សេងៗ។

សម្តេចបានបន្តថា រាជរដ្ឋាភិបាលថ្មីនីតិកាលទី៦ ដែលដឹកនាំដោយសម្តេចផ្ទាល់ នឹងបន្តជំរុញលើកទឹកចិត្ត និងផ្តល់នូវការគាំពារខ្ពស់ចំពោះអ្នក វិនិយោគទុនបរទេសទាំងអស់ ក្នុងនោះរាប់ទាំងវិនិយោគទុនចិនដែលមានវត្តមាននៅទីនេះ និង ដែលមានគម្រោងទៅបណ្តាក់វិនិយោគក្នុងប្រទេសកម្ពុជា នៅថ្ងៃអនាគតផងដែរ។

សម្តេចបានគូសបញ្ជាក់ទៅកាន់បណ្តាក្រុមហ៊ុនចិន​ កុំមានការភ័យខ្លាចទៅលើការលុបកុងត្រា ចាស់ណាមួយ ពីសំណាក់ក្រុមហ៊ុនវិនិយោគទុន តែផ្ទុយទៅវិញរាជរដ្ឋាភិបាលថ្មី នីតិកាលទី៦​ក្រោមការដឹកនាំដោយផ្ទាល់ពីសម្តេចតេជោ​ សម្តេចនឹងបន្តការពារនូវរាល់ផលប្រយោជន៍របស់ក្រុម​ហ៊ុនទាំងអស់ ក្នុងប្រទេសកម្ពុជា។

សម្រាប់ពាណិជ្ជកម្មទ្វេភាគីរវាងកម្ពុជា និងចិន ក៏មានការកើនឡើងគួរឲ្យកត់សម្គាល់ក្នុងរយៈពេលមួយទសវត្សរ៍ចុងក្រោយនេះ ដោយបានកើនឡើងដល់ ៥,៨ ប៊ីលានដុល្លារអាមេរិក តាមស្ថិតិឆ្នាំ ២០១៧ គឺកើនឡើងប្រមាណ ២២% ធៀបនឹងឆ្នាំកន្លងទៅ។ សម្រាប់ការវិនិយោគពីប្រទេសចិនមានការកើនឡើងគួរឲ្យកត់សម្គាល់ រយៈពេលបីឆ្នាំកន្លងទៅនេះ ដោយបានកើនឡើងពីប្រមាណ ៩០០ លានដុល្លារអាមេរិកនៅឆ្នាំ ២០១៦ ដល់ ១,៦ ប៊ីលានដុល្លារអាមេរិកនៅឆ្នាំ ២០១៧ និងក្នុងរយៈពេល ៧ ខែដើមឆ្នាំ ២០១៨ នេះបានកើនដល់ ២,៨ ប៊ីលានដុល្លារអាមេរិក។

ដោយឡែកអ្នកទេសចរចិនទៅទស្សនាកម្ពុជាវិញ បានកើនឡើងដល់ ១,៣ លាននាក់ ហើយមានក្រុមហ៊ុនអាកាសចរណ៏ចិនចំនួន ១៦ ក្រុមហ៊ុនកំពុងប្រតិបត្តិការហោះហើរត្រង់ពីចិនទៅកម្ពុជា។ លើសពីនេះទៀត ដើម្បីឆ្លើយតបទៅនឹងកំណើនទំនាក់ទំនងពាណិជ្ជកម្ម និងទេសចរណ៍រវាងប្រទេសទាំងពីរ ក្រុមហ៊ុនអាកាសចរណ៍ AirChina នឹងបើកជើងហោះហើរត្រង់ពីប៉េកាំងទៅភ្នំពេញ ដោយចាប់ផ្តើមនៅថ្ងៃទី ០១ ខែវិច្ឆិកា ឆ្នាំ២០១៨ ខាងមុខនេះ។

សម្តេចនាយករដ្ឋមន្រ្តីបានបន្តធ្វើការអំពាវនាវដល់បណ្តាក្រុមហ៊ុនវិនិយោគចិនទាំងអស់ ត្រូវបន្តមកបណ្តាក់ទុន ក្នុងប្រទេសកម្ពុជាឲ្យបានកាន់តែច្រើនឡើង ព្រោះកម្ពុជានៅមានសក្តានុពលជាច្រើន ក្នុងការវិនិ​យោគ ដើម្បីជម្រុញកំណើនសេដ្ឋកិច្ច និងការអភិវឌ្ឍប្រទេសកម្ពុជាឲ្យកាន់តែមានការរីកចម្រើនថែមទៀត៕  អត្ថបទដោយ៖ ម៉ន វុទ្ធា