យុវជន២នាក់កាន់លុយ៤០០ដុល្លារបង្កើតក្រុមហ៊ុនមួយកំពុងតែកាក់កបលើវិស័យដឹកជញ្ជូន

យុវជន២នាក់កាន់លុយ៤០០ដុល្លារបង្កើតក្រុមហ៊ុនមួយកំពុងតែកាក់កបលើវិស័យដឹកជញ្ជូន

Posted 17/9/2018

លោកម៉ែន វណ្ណាស្ថាបនិកក្រុមហ៊ុនដឹកជញ្ជូន Home Express ទើបតែបើកទ្វាររកស៊ីជិតបាន​មួយខែប៉ុណ្ណោះ ប៉ុន្តែកំពុងតែមមាញឹកខ្លាំងគ្រាន់បើដែរ។ ស្ថាបនិកវ័យក្មេងរៀនមិនទាន់ចប់រូបនេះ បង្ហើបថា បង្កើតក្រុមហ៊ុនដ៏តូចមួយនេះ ចាយទុនតែជាង៤០០ដុល្លារតែប៉ុណ្ណោះ ដោយសារតែពេល​ចាប់ផ្តើមដំបូងនេះ ពួកគាត់ជាអ្នកបម្រើសេវាកម្មដោយខ្លួន​ឯង ក្រោយធ្វើការងារផ្នែកនេះឲ្យគេ​ជាងមួយ​ឆ្នាំរួចមក។

យុវជនមានស្រុកកំណើតនៅខេត្តបាត់ដំបងរូបនេះបន្តថា ក្រោយពេលធ្វើការឲ្យគេជាងមួយឆ្នាំរួចមក ឃើញថា ការផ្តល់សេវាកម្មមានបញ្ហាមួយចំនួន ដែលក្រុមហ៊ុនមិនបានដោះស្រាយដល់ភ្ញៀវ ខណៈ​តម្រូវ​ការផ្នែកដឹកជញ្ជូនសម្រាប់អ្នកលក់អនឡាញ មានចំនួនច្រើនលើសលុប រាប់ចាប់ពីរាជធានីភ្នំពេញ ជន់ជោរហូរហៀរទៅដល់បណ្តាខេត្តធំៗនានាទៀតផង។

លើសពីនេះទៅទៀតយុវជនវ័យ២៥ឆ្នាំរូបនេះ មានបំណងផ្តល់ជូនសេវាកម្មសម្រាប់អ្នក​លក់អនឡាញ​នៅទូទាំង​ប្រទេសទៀតផង។ ជាមួយគ្នានេះទៀតចំពោះមុខបន្ទាប់ពី​ដំណើរការបានដល់ឆ្នាំ​ក្រោយ​សហគ្រិន​វ័យក្មេងរូបនេះ ចង់ពង្រីក​ក្រុមហ៊ុនដោយបន្ថែមអ្នកដឹកឲ្យបានដល់១០នាក់ ក៏ដូចជាទីតាំងធំ​ជាងមុន និងបច្ចេកទេសផ្សេងៗ​ឲ្យបានកាន់តែទំនើប។

គួរជម្រាបថា Home Express មានផ្តល់ជូនកន្លែងស្តុកដោយឥតគិតថ្លៃសម្រាប់អ្នកលក់អនឡាញនៅតាមបណ្តាខេត្តនានា និងធានាការទូទាត់ថ្លៃទំនិញទៀតផង ដែលលោកអ្នកអាចទាក់ទងបានតាមលេខទូរស័ព្ទ ០១៥ ៣៥៤ ៥៩៧៕