លោកគាម សៀកឡុង៖ ផ្តាំយុវជនខ្មែរធ្វើរឿងសំខាន់ៗនេះសិន មុនចេញរកស៊ីវិស័

លោកគាម សៀកឡុង៖ ផ្តាំយុវជនខ្មែរធ្វើរឿងសំខាន់ៗនេះសិន មុនចេញរកស៊ីវិស័យអចលនទ្រព្យ

Posted 17/9/2018

យុវជនខ្មែរដែលប្តេជ្ញាចិត្តចេញរកស៊ីលើវិស័យអចលនទ្រព្យ ត្រូវតែមានក្តីស្រមៃ គោលដៅ ឆន្ទៈ និងគោលការណ៍ច្បាស់លាស់ មិនអាចេញរកស៊ីជ្រើមជ្រួលតាមគ្នា ឬឃើញគេរកស៊ីឆាប់មាន ធ្វើតាមគេនោះទេ។ បន្ទាប់ពីមានចំណុចសំខាន់ទាំងអស់នេះ យុវជនដែលឆ្លាតវៃត្រូវត្រៀមចំណុចសំខាន់ៗមួយចំនួន មុននឹងចេញរកស៊ី មិនអាចចេញរកស៊ីទាំងប្រថុយប្រថាននោះទេ ឬអាចនិយាយបានថា មុនធ្វើអ្វីមួយត្រូវមានផែនការច្បាស់លាស់។ ថ្ងៃនេះលោកគាម សៀកឡុង ស្ថាបនិកក្រុមហ៊ុន Century21 Dream Property បានផ្តាំផ្ញើរដល់យុវជនខ្មែរត្រូវតែធ្វើរឿងសំខាន់ៗមួយចំនួន មុនចេញរកស៊ីវិស័យអចលនទ្រព្យ ដែលអាចទទួលបានជោគជ័យនៅថ្ងៃអនាគត។

លោកគាម សៀកឡុង មានប្រសាសន៍ថា  តាមរយៈបទពិសោធន៍រកស៊ីខាតកន្លងមក យុវជនក្រោយពីបញ្ចប់ការសិក្សាភ្លាម មិនគួរចេញរកស៊ីភ្លាមៗនោះទេ ត្រូវតែប្រឡូកធ្វើការវិស័យអចលនទ្រព្យយ៉ាងហោចណាស់៥ឆ្នាំ ទើបអាចសាកល្បងបាន ព្រោះរៀងចាស់ចិត្ត និងគំនិតហើយ ហើយរកស៊ីកុំគិតងាយពេក មិនមែនចាប់ផ្តើមឡើងជោគជ័យភ្លាមៗនោះទេ។

យុវជនត្រូវតែប្រឡួកការងារ ក្នុងសង្គមឱ្យបានច្រើន ដើម្បីកសាងបណ្តាញ បទពិសោធន៍ រាប់អានអ្នករកស៊ីឱ្យបានច្រើន។ ជាពិសេសត្រូវរៀនអំពីដំណើរការនៃក្រុមហ៊ុន តាំងពីការគ្រប់គ្រងធនធានមនុស្ស ហិរញ្ញវត្ថុ ជំនាញលក់ រៀនអំពីរបៀបដោះស្រាយបញ្ហាជាដើម បើមិនត្រៀមឱ្យបានល្អទេ យុវជនអាចងាយបាក់ទឹកចិត្ត ឆាប់បោះបង់ចោលការរកស៊ីរបស់ខ្លួន។

សហគ្រិនរូបនេះបន្តថា ការចេញរកស៊ីយុវជនមិនត្រូវគិតងាយៗទេ បើគិតបែបនេះច្បាស់ជាបរាជ័យមិនខាន ព្រោះបញ្ហាក្នុងការរកស៊ីមានច្រើនអាចហួសការគិតរបស់យើង ដូច្នេះយុវជនត្រូវប្រឡួកការងារ និងសង្គម ដើម្បីកសាងគ្រឹះ សមត្ថភាពខ្លួនឯង និងកសាងបណ្តាញក្នុងវិស័យអលចនទ្រព្យឱ្យច្រើនតាមដែលអាចធ្វើទៅបាន។

លោកបានបន្ថែមថា ក្រោយពីត្រៀមចំណេះដឹង បទពិសោធន៍ មានទំនាក់ទំនងជាមហាជនទូទៅហើយ យុវជនអាចសហការគ្នាចេញរកស៊ី ក៏ជាការល្អផងដែរ ព្រោះរកស៊ីម្នាក់ឯងពិបាកក្នុងការពង្រីកខ្លួន នៅពេលរីកចម្រើន ដោយសារត្រូវការដើមទុន និងការគ្រប់គ្រងកាន់តែមានទំហំធំជាងមុន។

យុវជនត្រូវចាំថា បើមានតែលុយ តែអត់គំនិតកម្រិតបរាជ័យមានខ្ពស់ សម្រាប់អ្នកចេញរកស៊ីវិស័យនេះ ព្រោះអាងមានលុយជួលគេមកគ្រប់គ្រងក្រុមហ៊ុន ទាំងខ្លួនគ្មានគំនិត បទពិសោធន៍ច្បាស់លាស់ មិនអាចមើលការខុសត្រូវដិតដល់ ច្បាស់ជាបរាជ័យនៅថ្ងៃណាមួយមិនខាន។ ផ្ទុយមកវិញ មានគំនិត តែអត់លុយ កត្តាជោគជ័យមានច្រើនអាស្រ័យលើកណ្តាប់ដៃសហគ្រិនខ្លួនឯងផ្ទាល់ ក្នុងការជ្រើសរើសផ្លូវដើរដោយប្រើគំនិតមិនប្រើលុយ។

លោកបានបញ្ជាក់ថា កត្តាបរាជ័យធំមួយទៀត សហគ្រិនរកស៊ីគ្មានទស្សនៈវិស័យច្បាស់លាស់ មិនបង្កើនចំណេះដឹងខ្លួនឯងបន្ថែម ចេះប៉ុន្មាន ធ្វើប៉ុណ្ណឹង ធ្វើរឿងដដែលៗ តែមិនព្រមរៀនអ្វីដែលថ្មី តាមរយៈការអានសៀវភៅ និងចូលរួមវគ្គបណ្តុះបណ្តាល រៀនពីគំនិអភិវឌ្ឍន៍ប្រទេសជិតខាងជាដើម។ ដូច្នេះយុវជនត្រូវតែ បង្កើនចំណេះដឹងខ្លួនឯងជាប្រចាំឱ្យទាន់ពេលវេលា មិនអាចដើរក្រោយទីផ្សារបាននោះទេ ត្រូវដើរមុនគេមួយជំហ៊ាន៕

អត្ថបទដោយ៖ ម៉ន វុទ្ធា