តោះមកស្គាល់តំបន់សំខាន់ៗ ដែលគម្រោងផ្លូវខ្សែក្រវ៉ាត់ក្រុងទី៣ នឹងត្រូវឆ្លងកាត់

តោះមកស្គាល់តំបន់សំខាន់ៗ ដែលគម្រោងផ្លូវខ្សែក្រវ៉ាត់ក្រុងទី៣ នឹងត្រូវឆ្លងកាត់

ដកស្រង់ និង កែសម្រួលដោយខ្ញុំបាទ អុន ថារិទ្ធ

Posted 3/9/2019

ដកស្រង់ចេញពីគេហៈទំព័រ Business Cambodia

កាលពីខែកក្កដា កន្លងមក ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀងឥណទានសម្បទានប្រមាណ ២៥៩លានដុល្លារ ជាមួយនឹងរដ្ឋាភិបាលចិន ដើម្បីយកទៅអភិវឌ្ឍន៍ផ្លូវខ្សែក្រវ៉ាត់ក្រុងទី៣ នៅកម្ពុជា។

គម្រោងផ្លូវខ្សែក្រវ៉ាត់ក្រុងទី៣នេះ មានប្រវែងសរុបប្រមាណ ៤៧.៦០៨គីឡូម៉ែត្រ​ និង​មាន​ទទឹង​សរុប ២៥​ម៉ែត្រ ជាប្រភេទផ្លូវ ៤គន្លង (២ទៅ ២មក) ដោយក្នុងមួយគន្លងមានទទឹង ៣,៥០ ម៉ែត្រ និង​ផ្លូវ​ទោចក្រ​យានយន្ត ២​គន្លង (១ទៅ ១មក) ក្នុងមួយគន្លងមាន​ទទឹង ២,២៥​ម៉ែត្រ។

គម្រោងថ្មី​នេះ នឹងត្រូវសាងសង់​ចាប់​ពីផ្លូវជាតិ​លេខ ៤ ម្តុំ​អូរដឹម ត្រង់​គីឡូម៉ែត្រ​លេខ ១៤+​១០៥ ទៅ​ចំណុច​បញ្ចប់​ភ្ជាប់នឹង​ផ្លូវជាតិ​លេខ១ ​ត្រង់​គីឡូម៉ែត្រ​លេខ ២៤+៨៤០ ដោយ​ភ្ជាប់ទៅ​នឹង​កំពង់ផែ​ភ្នំពេញ​ថ្មី។ ផ្លូវនេះ នឹងត្រូវ​ឆ្លង​កាត់​ផ្លូវ​ជាតិលេខ៣​ ផ្លូវ​ជាតិ​លេខ​​២ និង​ផ្លូវ​ជាតិ​លេខ​២១ ព្រមទាំង​មាន​ផ្លូវ​ខ្នែង​ប្រវែង​ ៥,៣៧គីឡូម៉ែត្រ​ផងដែរ។

សម្រាប់វិស័យអចលនទ្រព្យការពង្រីកផ្លូវក្រវ៉ាត់ក្រុងថ្មីនេះគឺបានបញ្ជាក់ថាវិស័យអចលនទ្រព្យកំពុងតែមានកំណើនខ្លាំងក្លាដែលទាមទារឲ្យពង្រីកទំហំក្រុងបន្ថែមទៀតដើម្បពង្រីកទំហំវិនិយោគឲ្យកាន់តែច្រើន។ គេក៏រំពឹងផ្លូវក្រវ៉ាត់ក្រុងដ៏ធំមួយនេះនឹងជម្រុញទាំងចំនួននិងតម្លៃអចលនទ្រព្យនៅក្នុងតំបន់នោះឲ្យកើនឡើងផងដែរ។​​

សូមបញ្ជាក់ថា គម្រោងសាងសង់ផ្លូវក្រវ៉ាត់ក្រុងទី៣នេះ ក៏មានការសាងសង់​ស្ពានអាកាសកាត់​ផ្លូវជាតិលេខ៤ លេខ៣ និងលេខ២១ ជាមួយនឹងការសាងសង់ស្ពានឆ្លងទន្លេបាសាក់ចំនួន១០ នៅស្រុកស្អាង ព្រមទាំងស្រុកកៀនស្វាយ ដែលមានទទឹង២៥m និងក្រាលកៅស៊ូអ៊ុត(ASphaltconcrete) រួមទាំងមានលូ១០១​កន្លែង ដែល​មាន២ប្រភេទគឺប្រភេទលូមូលចំនួន២៨កន្លែង មុខកាត់ជាមធ្យម១,៦០m ប្រភេទលូជ្រុង​ចំនួន៧៣​កន្លែង មុខកាត់ជាមធ្យម ៣ម៉ែត្រ ៕