ចង់រកស៊ីជោគជ័យលើវិស័យអចលនទ្រព្យ សហគ្រិនត្រូវមានបេះដួងស្មោះត្រង់លើរឿង៣

ចង់រកស៊ីជោគជ័យលើវិស័យអចលនទ្រព្យ សហគ្រិនត្រូវមានបេះដួងស្មោះត្រង់លើរឿង៣

ដកស្រង់ និង កែសម្រួលដោយខ្ញុំបាទ អុន ថារិទ្ធ

Posted 3/9/2018

អ្នកចេញរកស៊ីវិស័យអចលនទ្រព្យច្រើនណាស់ តែបុគ្គលជោគជ័យហាក់មានចំនួនតិចតួចបំផុត បើធៀបចំនួនអ្នករកស៊ី ជាក់ស្តែងសេដ្ឋីអចលនទ្រព្យលើពិភពលោកខាងវិស័យអចលនទ្រព្យមានចំនួនតិច តែសហគ្រិនរកស៊ីក្នុងប្រទេសនីមួយៗមានច្រើន។ ភាពបរាជ័យ ឬជោគជ័យទាំងឡាយ កើតចេញពីសហគ្រិនខ្លួនឯងផ្ទាល់តែម្តង តើមានការតស៊ូព្យាយាម ឬឆ្លាតវៃប៉ុណ្ណា ក្នុងក្តោបក្តាប់ឱកាសល្អៗ ចំពោះមុខ និងការបង្កើតឱកាសកម្រិតណា ដើម្បីទទួលបានភាពជោគជ័យ។ តែបាតគ្រឹះដែលជាចំណុចចាប់ផ្តើមធំបំផុត គឺបេះដួងសហគ្រិនតែម្តង តើបានស្មោះត្រង់ចំពោះរឿងសំខាន់ ៣ខាងក្រោមហើយឬនៅ?

សហគ្រិនអចលនទ្រព្យដំបូងដៃ ត្រូវតែជាមនុស្សមានបេះដួងស្មោះត្រង់ចំពោះខ្លួនឯង តើពិតទេខ្លួនចេញរកស៊ីដោយបេះដួង មិនចេះតែចេញរកស៊ីតាមគ្នីគ្នា? តើច្បាស់ទេ ខ្លួនពិតជាស្រឡាញ់វិស័យនេះ ច្រើនជាងវិស័យផ្សេង ឬក៏ចង់ត្រឹមក្លាយជាអ្នកមានក្នុងរយៈពេលខ្លី ទើបចេញរកស៊ីអចលនទ្រព្យ? សំណួរទាំងអស់នេះ ពិតជាមានសារៈសំខាន់បំផុតចំពោះសហគ្រិន បើនៅស្រពិតចស្រពិល ត្រូវតែឱ្យច្បាស់លាស់ចំពោះខ្លួនឯង។ បើយើងស្រឡាញ់វាចេញពីបេះដួងហើយ ការងារភាគច្រើនយើងនិងខិតខំធ្វើឱ្យល្អអស់ពីចិត្ត ខំតស៊ូមិនរត់ចោលបញ្ហា ទោះធំប៉ុន្មាន ហើយនិងក្លាយជាបុគ្គលគ្មានលេសរាប់រយជំពូកក្នុងខ្លួននោះទេ។ ហើយតែងតែបង្កើតគំនិតថ្មីៗ ក្នុងការជំរុញការងារឱ្យដើរទៅមុខបានល្អ ជាពិសេសមានដំណោះស្រាយល្អៗ ក្នុងការដោះស្រាយបញ្ហាដែលកើតមាន។

បេះដួងស្មោះត្រង់ទី២ គឺមានចំពោះក្រុមការងារ ឬអាចហៅថាបុគ្គលិក ជាកាពិតក្នុងនាមជាអ្នកដឹកនាំ មេទ័ព ប្រធានក្រុមហ៊ុន អ្នកដឹកនាំក្រុម ត្រូវតែមានបេះដួងស្មោះត្រង់ចំពោះពួកគេ ទោះក្នុងកាលៈទេសៈណាក៏ដោយ។ ជាក់ស្តែងយើងអាចបរាជ័យលើការងារទាំងមូលបាន តែមិនអាចបរាជ័យលើការដឹកនាំក្រុមការងារបាននោះទេ បរាជ័យការងារបាន តែមិនអាចបរាជ័យគំនិត ទឹកចិត្ត និងបេះដួងក្រុមការងារបានទេ។ ទោះបរាជ័យការងារក្តី តែបេះដួង ទឹកចិត្ត គំនិតនៅតែមានឱកាសជោគជ័យនៅតែមានសម្រាប់យើង ព្រោះក្រុមការងារនៅតែមានកម្លាំងងើបឡើងក្នុងស្ថានភាពលំបាកប៉ុន្មានក៏ដោយ។ មានបេះដួង មានទឹកចិត្ត មានភាពស្មោះត្រង់ចំពោះក្រុមការងារ នោះពួកគេក៏ស្មោះត្រង់ចំពោះអ្នកវិញដែរ។

ចំណុចពិសេសមួយទៀត គឺមានបេះដួងស្មោះត្រង់ចំពោះអតិថិជន គ្មានសហគ្រិនអចលនទ្រព្យណាមួយ ដែលអាចជោគជ័យទៅបាន ដោយគ្មានបេះដួងស្មោះត្រង់ចំពោះអតិថិជននោះទេ។ ប្រសិនបើអ្នករកស៊ីបោកប្រាស់ មិនយកចិត្តទុកដាក់ មិនសូវខ្វល់ពីអ្នកទទួលសេវាកម្មពីយើងច្បាស់ណាស់ថា កត្តាមិនជោគជ័យមានច្រើន ហើយនៅពេលអនាគតក៏បាត់បង់អតិថិជន ពួកគេលេងប្រើប្រាស់ និងឈានទៅដល់ការណែនាំអ្នកផ្សេងទៀត កុំឱ្យប្រើប្រាស់ ឬទិញអចលនទ្រព្យយើងក៏អាចថាបាន(ត្រូវតែសន្សំអតិថិជនល្អៗឱ្យបានច្រើន ឱកាសជោគជ័យក៏មានច្រើន)។ បរាជ័យ ឬបញ្ហារបស់អតិថិជនដែលកើតចេញពីការទិញ ឬទទួលសេវាកម្ម គឺជាបរាជ័យដ៏ធំបំផុតរបស់យើងជាភ្នាក់ងារ ឬម្ចាស់ក្រុមហ៊ុនអចលនទ្រព្យ ហើយត្រូវតែរកដំណោះស្រាយភ្លាមៗ។

ជាកាតពិតណាស់ មានបេះដួងស្មោះត្រង់ចំពោះរឿង៣ខាងលើនេះ គឺជាភាពជោគជ័យធំបំផុតរបស់សហគ្រិន ដែលធ្វើឱ្យសហគ្រិនមានភាពជាអ្នកដឹកនាំ ទឹកចិត្ត គំនិត និងមានទស្សនៈវិស័យដ៏ពិតប្រាកដមួយក្នុងការចេញរកស៊ីវិស័យអចលនទ្រព្យ ហើយឆាប់ទទួលបានជោគជ័យលើការងារជាក់ស្តែង៕